​
​តុលាការ​ស្រុក Yuexiu ខេត្ត Guangzhou ប្រទេស​ចិន​បានប្រកាស​ឈប់​ឲ្យ​ក្រុមហ៊ុន​ស្រោមអនាម័យ Okamoto របស់​ជប៉ុន ឈប់​ផ្សាយពាណិជ្ជកម្ម​ថា ស្រោមអនាម័យ​របស់ខ្លួន​ស្ដើង​ជាងគេ​បំផុត ហើយ​ត្រូវ​លុបចោល​រាល់​ការផ្សាយ​បែបនេះ នៅលើ​ប្រអប់​ស្រោមអនាម័យ​របស់ខ្លួន ព្រោះ​ពេល Okamoto មិនមែនជា​ស្រោមអនាម័យ​ស្ដើង​ជាងគេ​បំផុត​ទៀត​ទេ ។​
​យោងតាម​សារព័ត៌មាន The Wall Street Journal ស្រោមអនាម័យ Aoni របស់​ចិន ផលិត​ដោយ​ក្រុមហ៊ុន Daming ដែលមាន​ប្រវត្តិ​តាំងពី​ឆ្នាំ​១៩៩២​មក​នោះ បានដាក់​ពាក្យ​ប្ដឹង​ក្រុមហ៊ុន Okamoto ជុំវិញ​ករណីនេះ កាលពី​ខែកញ្ញា ឆ្នាំ​២០១៤ ព្រោះថា​នៅ​ខែធ្នូ ឆ្នាំ​២០១៣ ក្រុម​កត់ត្រា​ឯក​ត្ត​កម្ម​ពិភពលោក (Guinness World Records) បានប្រកាសថា Aoni ជា​ស្រោមអនាម័យ​ស្ដើង​ជាងគេ ដោយ​វា​មាន​កម្រាស់​តែ​០.០៣៦​មិល្លីម៉ែត្រ​ប៉ុណ្ណោះ ខណៈដែល Okamoto មាន​កម្រាស់​ដល់​ទៅ​០.០៣៨​មិល្លីម៉ែត្រ ។​
​ការកាត់ក្ដី​ធ្វើឡើង​ដោយ​តម្រូវ​ឲ្យ​ក្រុមហ៊ុន Okamoto សងជំងឺចិត្ត​ដល់​ក្រុមហ៊ុន Daming ក្នុង​ទំហំ​ទឹកប្រាក់​១​យ័ន ដែល​ស្នើឡើង​ដោយ​ក្រុមហ៊ុន Daming ផ្ទាល់​តែម្ដង ហើយ​តម្រូវ​ឲ្យ​ក្រុមហ៊ុន Okamoto ឈប់​ផ្សាយពាណិជ្ជកម្ម​ថា ស្រោមអនាម័យ​របស់ខ្លួន​ស្ដើង​ជាងគេ​បំផុត ហើយ​ត្រូវ​លុបចោល​រាល់​ការផ្សាយ​បែបនេះ នៅលើ​ប្រអប់​ស្រោមអនាម័យ​របស់ខ្លួន ។​
​អ្នកនាំពាក្យ​របស់​ក្រុមហ៊ុន Okamoto ក៏​មិនបាន​តវ៉ា ឬ​ជំទាស់​នឹង​ការសម្រេច​ក្ដី​នេះដែរ ដោយ​លោក​បាន​ថ្លែងថា “​យើង​ទទួលយក​ការសម្រេចចិត្ត​មួយ​នេះ ហើយ​ពួកយើង​ក៏​គ្មាន​គម្រោង​ចង់​ប្ដឹង​បន្តទៅ​វិញ​ដែរ​” ទន្ទឹមនឹងនេះ ក្រុមហ៊ុន​ក៏​កំពុង​អនុវត្តតាម​សាលក្រម​របស់​តុលាការ​ដែរ នោះ​គឺ​ឈប់​ផ្សាយ​ស្រោមអនាម័យ Okamoto ថា​ជា​ស្រោម​ស្ដើង​ជាងគេ​បំផុត​ក្នុង​លោក ៕


​